கோலாலம்பூர்-
'தேசிய உருமாற்றம் 50' எனப்படும் 'திஎன்50' (TN50) அமலாக்கத்தில் இந்திய இளைஞர்கள் எதிர்நோக்கும் பல்வேறு பிரச்சினைகளுக்கும் சந்திக்கும் சவால்களுக்கும் உரிய தீர்வு காணப்பட வேண்டும் என இந்திய இளைஞர்கள் தங்களது மனக்குமுறலை வெளிபடுத்தினர்.
மலேசிய மக்கள் சக்தி கட்சி, சக்தி அறவாரியம் ஏற்பாட்டில் மலாயா பல்கலைக்கழகத்தில் இந்திய இளைஞர்களுடனான 'திஎன்50' கலந்துரையாடல் நடத்தப்பட்டது. முதல் முறையாக தமிழில் நடத்தப்பட்ட இந்த கலந்துரையாடலில் பல்வேறு பகுதியிலிருந்து இளைஞர்கள், கல்லூரி மாணவர்கள், பல்கலைக்கழக மாணவர்கள் கலந்து கொண்டு தங்களது கருத்துகளை துணிச்சலுடன் வெளிபடுத்தினர்.
அரசாங்க வேலை வாய்ப்பு என்பது இன்றைய இளைஞர்களுக்கு 'குதிரை கொம்பாக'வே உள்ளது. பல்வேறு எதிர்பார்ப்புகளுடன் லட்சிய எண்ணங்களை வளர்த்துக் கொண்டு கல்வியில் சிறந்த மதிப்பெண்களை பெற்று தகுதி வாய்ந்த வேலை வாய்ப்புகளுக்கு விண்ணப்பித்தால் அதை விடுத்து வேறு வேலைகளில் பணியமர்த்துவது எங்களின் கனவை சிதைப்பதற்கு சமமாகும் என ஓர் இளைஞர் கூறினார்.
ஆனால் கல்வி கடனுதவி வேண்டுபவர்கள் பிற கட்சிகளிலும் இருக்கலாம். ஆதலால் அனைத்து இனத்தவர்களுக்கும் பயனளிக்கும் வகையில் பொது நிலையிலான கல்வி கடனுதவி ஸ்தாபனம் வேண்டும் எனவும் இளைஞர்கள் கோரிக்கை விடுத்திருந்தனர்.
கல்வி, பொருளாதாரம், தற்கால வாழ்க்கைச் சூழல் போன்றவற்றை உள்ளடக்கி இந்நிகழ்வில் கலந்து கொண்ட இளைஞர்கள் தங்களது கருத்துகளை வெளிப்படுத்தினர்.
இந்நிகழ்வு குறித்து கருத்துரைத்த மலேசிய மக்கள் சக்தி கட்சியின் தேசியத் தலைவர் டத்தோ ஆர்.எஸ்.தனேந்திரன், இதுவரை எந்தவொரு அரசியல் கட்சியும் ஏற்பாடு செய்திடாத 'திஎன்50' கலந்துரையாடல் முதல் முறையாக தமிழில் நடைபெற்றது.
இந்த இளைஞர்களின் கருத்துகள் தொகுக்கப்பட்டு பிரதமர் டத்தோஶ்ரீ நஜிப் துன் ரசாக் கவனத்திற்குக் கொண்டுச் செல்லப்படுவதோடு இளைஞர்களின் எதிர்பார்ப்புகள் நிஜமாக ஆவன செய்யப்படும் எனவும் டத்தோ தனேந்திரன் குறிப்பிட்டார்.
திஎன்50-இன் இளையோர் தூதுவரான கணேஷ் முரேன், மலாயா பல்கலைக்கழக பேராசிரியர் டாக்டர் எம்.இராஜேந்திரன் உட்பட மலேசிய மக்கள் சக்தி, சக்தி அறவாரியம் பொறுப்பாளர்கள் கலந்து கொண்டனர்.
No comments:
Post a Comment